გწამდეს, ვერ ვიქნები კარგად,
ფიქრებს სინანულით მივსებ...
ისევ გპოულობ და გკარგავ,
გკარგავ და გპოულობ ისევ...

სევდა ჩაეღვარათ რითმებს,
წვიმაც სევდიანად შრება...
რჩებათ ტკივილები თითებს,
თითებს ტკივილები რჩებათ.

სულზე გადავიმტვრევ დარდებს,
ცრემლებს ჩამოვიკრეფ ციდან...
მცივა, მარტო ვარ და ისევ,
ისევ მარტო ვარ და მცივა.

პირველ გაწვიმების ფერად,
პირველ გაწვიმების მსგავსად,
გკარგავ, გპოულობ და გხედავ,
გხედავ, გპოულობ და გკარგავ.

გწერ და ყველაფერი ცუდად,
ანდაც უარესად არის...
მაცლის ხასიათი სუნთქვას,
სუნთქვას ხასიათი მაცლის.

სევდა ჩაეღვარათ რითმებს,
ცრემლიც სევდიანად შრება...
რჩებათ ტკივილები თითებს,
თითებს ტკივილები რჩებათ.