კომენდანტის საათის დაწყებამდე დარჩენილი იყო 3 ან შეიძლება 4 საათი. ჩემი ლაბადა შემოიცვა,  ეწევა. ნახევრად გავაღეთ აივნის კარი და ტყვიისფერი  მძიმე ფარდა ბოლომდე დავუშვით. 
– ნახევარ საათში უნდა წავიდე!
– წავიდეთ, არც მე ვაპირებ აქ დარჩენას.
ზედ მაწევს, ჩვარივით მსუბუქია და ოფლიანი. ვეწევით, ღვინო აღარც იმას უნდა. მთხოვს, რომ ყელსა და ტუჩებზე კვალი არ დავუტოვო. როცა მიდის აბაზანაში, სარკეში ტუჩსაცხით იღებავს მცირე სისხლნაჟღენთებს.

სასტუმროში მხოლოდ ჩვენ ვართ და მასპინძელი,  ახალგაზრდა კაცი,  თხელი, ლამაზთვალებიანი. ფერი ვერ დავიმახსოვრე, როდესაც მივედი, ერთხანს ვისაუბრეთ და რამდენჯერმე მოვასწარი მისთვის  ფარულად მეცქირა. 
იმ დღეს წვიმდა, მთელი ღამეც არ შეწყვეტილა და მეორე დღის შუადღემდე იყო ასეთი ამინდი.