უილიამ ბლეიკი - მწუხრის ვარსკვლავს

ოქროსთმიანო ანგელოზო მწუხრის, სხივნართი
მზე საღამოჟამს მთების იქით რადგანაც ჩახდა,
აანთე ტრფობის ჩირაღდანი; შუქმომფინარი
ჯიღა დაიდგი, გაგვიღიმე მიმწუხრის ტახტთან!

ღიმით შეგვიმკე სიყვარულიც, იისფერ ფარდებს
სანამ დაუშვებ, მოაპკურე ვერცხლისფერ ცრემლად
მძინარ ყვავილებს დანაცვარი და მონავარდე
ფრთამსუბუქ ზეფირს ტბათა შორის მოჰგვარე თვლემა.

ვერცხლში განბანე მწუხრი, შენი თვალთა ციალით
იდუმალება მოაფინე გარემოს ახლად,
როცა გვშორდები, მგელთა ხროვა საზარ ღრიალით
დუმილს დაარღვევს, ტევრში ლომიც დააღებს ხახას.

ცხვართა საწმისებს ცვარავ წმინდა ნამის წინწკლებით,
გთხოვ დაიფარო ფარა შენი ძალმოსილებით.

30 აგვისტო, 2022 წ.


ორიგინალი იხილეთ აქ: https://genius.com/William-blake-to-the-evening-star-annotated