მიდით, ჰო, იქირქილეთ,
სხვა რა გაქვთ გასართობი,
ტანით ვგრძნობ,
რომ ზურგს უკან
დამყვება ირონია,
არადა გაყინული
ამ ძვლების გასათბობად
თუ რამე მაბადია,
ნატკენი სტრიქონია...
ჰო, ყველამ იქირქილეთ -
ეს როგორ გამიბედავს,
დაკარგულ სიყვარულს რომ
ვერთგულობ ამ ლექსებით,
გესლს დააკვესებენ
და გული აბედობს,
თასო, მოთმინების,
შენც უკვე მევსები...
ჰოდა, იქირქილეთ,
მკვდარიც და ცოცხალიც,
გოგო ვარ, უკადრად
როგორ მოგიხსენოთ?
მაწყევარს, მაწყინარს,
მასწავლე, ვლოცავდე,
უფალო მიხსენი!
უფალო მიხსენი!