ყველამ იცით, ნადირთ მეფე
დღემდე ლომი იყო მუდამ.
ხმას ვერავინ ვერ იღებდა,
თუმც მეფობა სხვებსაც სურდათ.

შეიცვალა ცხოვრება და
ახმაურდნენ ცხოველები:
- თუა დემოკრატიაო,
ჩავატაროთ არჩევნები.

შეადგინეს სიები და
გამოაკრეს შინ თუ გარეთ.
ტურა დასვეს საარჩევნო
კომისიის თავმჯდომარედ.

თვლა არ უჩანთ დამკვირვებლებს,
გრძელი რიგი დადგა მათი –
არქტიკიდან საგანგებოდ
ჩამოვიდა თეთრი დათვი.

ავსტრალიის შტატებიდან
კოალა და კენგურუა,
აქლემია უდაბნოდან,
მერე რა, რომ ცოტა ყრუა.

შეკვრა ბიულეტენების
მოიტანეს სისხამ დილით,
საგანგებოდ ევკალიპტის
ფოთლებზეა დაბეჭდილი.

ზედ წერია სახელები,
ყველას თავის ნომერი აქვს:
პირველია მელაკუდა,
რიცხვი ორი ერგო ნიანგს.

მესამეა თავად ლომი –
მასაცა აქვს ამის ნება.
ცხოველებმა გადაწყვიტონ
მათი მეფე ვინ იქნება.

სიაშია კიდევ ორი,
რომელია დასაწუნი –
მეოთხეა თუთიყუში,
მეხუთე კი – მაიმუნი.

ხმაურია, ყაყანია,
ვინ რას ყვირის, ვერვინ იგებს.
ჟირაფი დგას უბანზე და
ცხოველთა რიგს აწესრიგებს.

როცა ყველამ გააკეთა
უკვე თავის არჩევანი,
დაიხურა უბნები და
არვინ იყო მომჩივანი,

ყველა ყუთი მოაგროვეს,
რათა ერთად დაიცალოს,
შეიკრიბა კომისია,
ხმები უნდა დაითვალოს.

მათ გარშემო დამკვირვებლებს
თვალი ფხიზლად კი ეჭირათ,
მაგრამ, ბიულეტენები,
თქვენც ხომ გახოვთ, მათდა ჭირად,

ევკალიპტის ფოთლებისგან
რომ დაბეჭდეს საგანგებოდ.
კოალამ კი, ამ მსუნაგმა,
კარგად იცის მისი გემო,

ვერ გაუძლო ცდუნებას და
ფოთლის გროვას ეცა სწრაფად,
სანამ ვინმე გონს მოვიდა,
ყველა ერთად გადაყლაპა...

. . . . . . . . .
ჩაიშალა არჩევნები,
დრო ტყუილად დაიხარჯა.
ევკალიპტი კოალას და
მეფობა კი - კვლავ ლომს დარჩა! 


2006