მუტანტი კალიებით გავსებულა ოთახი.
ისინი ჰგვანან ტელევიზიის ფასადზე შერჩენილ ნატყვიარებს,
და მე
მახსენდება ომი (ომები!),
როცა სიმართლე -
გასული საუკუნის ოცდაათიანი წლების რადიოგრამა -
ისმინება ძლივს და ალაგ-ალაგ,
როცა ქალაქი სუნთქვადა ცალი ფილტვით
და მეორეს,
საკუთარი ხელით დაკემსილს,
ინახავდა სპირტში,
ყოველი შემთხვევისთვის.

მუტანტი კალიები დამსხდარან ფარდებზე.

ახლა გადანერგვის ოპერაციების დროა
და უხარისხო ფირების აღდგენის,
მაგრამ უცხოეთში არიან პროფესიონალები,
აქ ვართ მხოლოდ ჩვენ -
უმუშევრები
ან ზაფხულის სიცხისგან გათანგული "კალიები"
და ვცდილობთ გავერიდოთ ალმურს...