დე, დავიღალე...
და შენც გადაგღალე...
გთხოვ, არ მოიბეზრო ჩემი ხუშტურები,
ცუდად მივეჩვიე, დედი, აპათიებს,
მაპატიე...

დე, დავიღალე... დავიღალე, დედა!
ბავშვობა ვითამაშო მინდა!
საბანი გამისწორე...
დე, სიცხე ხომ არ მაქვს?
შუბლს ისევ მოგიტან პირთან...

გრილი ტუჩები გაქვს, ბავშვობის სუნი აგდის,
დარდები გამიქრე, დედა!
ისევ მეთამაშე,
ისევ გამიჯავრდი,
ისევ დაიძინე ჩემთან!

ქუჩაში წავიქცევი, მუხლებს დავიყვლეფ და
ტირილით მოგადგები, დე!
გულში ჩამიკრავ მაგრად მაგრად მაგრად,
კოცნით დამისრულებ დღეს!

ვნანობ ყველა სიტყვას, სულ ყველა ურჩობას,
დედიკო, მაპატიე...
ოჰ, შენ რომ იცოდე ტირილში რამდენი ღამე გავათიე...

დე, დავიღალე... დავიღალე, დედა!
სიკვდილს ვეხვეწები უფალს!
ვცოდავ, დასჯის ნაცვლად დალოცვილი ღმერთი
წყალობას მიბრუნებს ხურდად...

დე, დავიღალე...
ამ უიმედო იმედით,
ამდენი ცოდვით დავიღალე...
თუ შენც გადაგღალე, თუ ცუდად მივეჩვიე აპათიებს
მერე რაა?
შენ ხომ დედა ხარ და აბა რის დედა ხარ
თუ არ მაპატიებ!