რეინკარნაცია

“. . . აჩრდილო, მითხარი სად არის ის მხარე ? ”
                                            - ედგარ ალან პო


ჩრჩილი ჩამისახლდა მე ჩემს კარადაში
ცოტა უცნაური, ჩრჩილი მარტოსული
არც მოხუცია და ვფიქრობ აღარც ბავშვი
არც ამქვეყნიური და არც ჩამოსული

დილით გამიკვირდა როცა დავასკვენი -
მისი გემოვნება ჩემსას ძლიერ ჰგავდა
(ხუთშაბათი იყო, უფრო პარასკევი)
მე რასაც ვიცმევდი ჩრჩილიც იმას ჭამდა

მალე გამომიჩნდა სულ სხვა თავსატეხი
ჯერ ვერ შევეგუე პირველს მე არადა
მყარად მოიკიდა ჩრჩილმა მართლაც ფეხი
მე გამიუცხოვდა ჩემივე კარადა

ისე მომიშალა ნერვები ამ ფაქტმა
ჩემი უცხო სტუმრის მოკვლა განვიზრახე
. . . და ვერ გავიმეტე, ვერ შევძელი რა ვქნა ?!
ისე მაგონებდა ჩემსას მისი სახე

ჩემი ორეული როგორ გამეწირა     
თითქოს მივეჩვიე თითქოს შემიყვარდა
(ან შაბათი იყო მგონი უფრო კვირა)       
ჩრჩილს “დ” ვაჩუქე და ჩემი ჩრდილი გახდა

მერე დრო გავიდა ვცხოვრობ მასთან ერთად
იქნებ ეს დრო არის ის დრო რასაც ველი
კარადაში ისევ არჩევანი ფერთა
ახლა ჩრდილს აცვია ჩემი ტანსაცმელი !!!