მელოდიები არ აცდიან ერთმანეთს დაკვრას
და უმაღლებენ უსაშველოდ ბგერებს და ჰანგებს
მდინარის იქით, მყუდრო ქოხში ნათურა ჩაქვრა
მდინარის აქეთ Pink Floyd - ი დიდ კედელს ანგრევს
ოცდამეერთეს ზურგით მოაქვს ბარგი ბინძური
ოცდამეორე კითხვის ნიშანს ამოფარვია ?
მდინარის იქით უპოვნია რაინდს მიჯნური
მდინარის აქეთ დაუკარგავთ რაც მთავარია
“მე”ფობს კომფორტი და დედოფლობს მის გვერდით ფული
დროს ტახტის ერგო უმნიშვნელო ფუნქცია წილად
მდინარის იქით ცხოვრებაა მშვიდი და რთული
მდინარის აქეთ უღიმიან ერთმანეთს ფრთხილად
დედამიწამაც ააჩქარა ჩვენს ჯიბრზე ბრუნვა
ალბათ სურს მალე მოამთავროს საქმე თავისი
მდინარის იქით ბავშვებს უყვართ საწოლზე ხტუნვა
მდინარის აქეთ დაუკარგავთ დედებს ხალისი
ოცნებებს უკვე რეალობის დასჩემდათ შიში
და დაძაბულებს ერთმანეთში მოსდით კამათი     
მდინარის იქით დაიმუქრა პაიკი ქიშით
მდინარის აქეთ განიცადა მეფემ შამათი
ხელი აიღო ხელოვნებამ და დარჩა ვნება
თავისუფლებამ უფლის ნებით მოიკლა თავი
მდინარის იქით ყვავილები ლამაზად ჭკნება
მდინარის აქეთ არ იციან რა არის ჭვავი
ამაზრზენია მაგრამ დროსაც დაედო ფერი
საოცარია მაგრამ დროსაც სრცხვენია თითქოს
მდინარის იქით სახლებს უყვართ თავისი მტვერი
მდინარის აქეთ ყველა სახლი დანგრევას ითხოვს   
ადამ – იანი ყოველ ფეხის ნაბიჯზე გვხვდება
ევ – ინიც იყოს იქნებ სადმე - ლოგიკურია
მდინარის იქით “არ არსებობს თვით უკვდავება”
მდინარის აქეთ სიკვდილსაც კი წასვლა სწყურია
გაორებული მდინარე კვლავ თავისთვის მიდის
ისევე როგორც დედამიწა ბრუნავს თავისთვის
მდინარის იქით სულს საკუთარს არავინ ჰყიდის
მდინარის აქეთ სულიც არ აქვთ უკვე თავისი
არც კალაპოტი აქვს მდინარეს არც შესართავი
არც ხიდი არ ჩანს ვერც გავაჩენ უბრალო სიტყვით           
მე მინდა ამ ლექსს რომ ვუწოდო სახელად ნავი             
გადამიყვანოს იქნებ ჩუმად მდინარის იქით !!!