“… ვიცი თუ როგორ მოვყვე ამბავი . “
                                    - მარკ ტვენი


გესაუბრები - გესმის თუ არა ?
მე გუშინ თეთრი სიზმარი ვნახე
არც დიდი იყო და არც პატარა
იმ სითეთრეში არ ჩანდა სახე
ცამ დააპირა მახსოვს კვლავ თოვა
მე მსურდა სითბო მენახა თოვლის
თოვლიც დამპირდა რომ სიზმრად მოვა
(ნიჭი არ მაქვს მე მგონი მოყოლის ?!)
. . . მერე მუსიკა გაისმა მშვიდი
მელანქოლიამ შემოსა სივრცე
ფიქრი არც მცირე და არც თუ დიდი
მაგრამ იმდენი რომ სხვასაც მივცე
გესაუბრები – ვნახე სიზმარი
ვიცოდი რომ იქ ცხოვრობდა ხალხი
უთენდებოდათ დილა ცისმარე
ეს ჩემი თვალით მქონდა ნანახი
სითეთრემ თითქოს გააქრო ყველა
. . . მერე გამოჩნდა ერთი ხე, ცალკე
და მეც ამ ხისკენ წავედი ნელა
ხეზე ეკიდა პატარა სარკე
მომინდა შიგნით ჩახედვა ძლიერ
სურვილი მქონდა მე მარტო ერთი
და მორიდებაც წამსვე დავსძლიე
. . . სარკეში ყველა ყოფილა თეთრი
გესაუბრები – მიხვდი თუ ვერა ?
უსასრულობის ვნახე საწყისი
შენი არ ვიცი და მე კი მჯერა
მთელი შეგნებით მჯერა ამისი 
. . . მერე იმ ხეზე შევნიშნე ვაშლი
ვიგემე. ვაშლი ჯერ იყო მკვახე
გესაუბრები - სიზმარს ვერ წაშლი
მე გუშინ თეთრი სიზმარი ვნახე !!!