ვიცი, მალე გაზაფხული მოვა...
ვიღაც ამბობს, სიყვარულით მთვრალი.
ვარდობისთვეს არ ვიქნები მარტო,
სიყვარულთან დავიწერე ჯვარი!
ვიღაც ამბობს, უხარია ძლიერ -
ელოდება მას სამოთხის კარი...
ლამის  ჩიტებს მიუმღეროს ლაღად,
ლამის გულში ჩაიხუტოს ქარი.
ვიღაცისთვის მზე ჩაქრება მალე.
დგება ბოლო ამოსუნთქვის ჟამი...
ვიღაცისთვის სიკვდილის გზა მოსჩანს -
თვალახელილს შეუსვია შხამი...
ვიღაც მაინც აღარაფერს ნანობს...
იღიმება... გულს არა აქვს დარი!
მაინც უფალს სამადლობელს უძღვნის..
ვაი, მას ვინც ცოცხალია მკვდარი!