აგვისტოს ომის გმირებს
------
ხევში დავუხვდი მტრის ცივ ქარავანს,
ცაზე ყმუოდა მთვარე მყეფარე
და საქართველოს ყველა გალავანს
უნდოდა მკერდით გადავეფარე...

შიგ გულში მომხვდა მაინც ოხერი,
რას იზამ, ძმაო, როცა ომია,
დავეცი, მაგრამ  ციხე ყოველი
ერთგულად მხრებში ამომდგომია...

არ დავიკვნესე, ხმა არ დავძარი,
უფლისციხელი ვარ უსახელო,
წავიქეცი და ყველა ტაძარი
ცდილობს, რომ ფეხზე წამომაყენოს...

ნელ-ნელა უკვე მიწას ვშორდები,
ცამდე სინათლით სავსე ხევია
და საქართველო ვაზის ფოთლებით
ზედ ჭრილობაზე შემომხვევია...




წმინდა ნინოს

სული უფალს
ღვაწლით მიანებე,
მწყურვალს ვაზის
ჯვარით არწყულებდი,
დღეს კი ვენახები 
შრიალებენ,
როგორც ფეხშიშველა
ქალწულები...


27 იანვარი 2012

ცაში ფიფქებია
 
ცაში ფიფქებია
იქეთ-აქეთური,
ალბათ ახლა გულში
რას არ გაივლებენ,
თოვლში დარჩენია 
ქალაქს ნაფეხური
დინჯი ხიდების და
ჩუმი აივნების...

ცოცხალია  გზაში,
ვინც ბავშვობას ეძებს,
ვინც კვლავ გუნდაობს და
ბედნიერი რჩება,
ხვალე მზე გამოვა,
ქალაქს ფეხსაცმელზე,
ალბათ მერამდენე
თოვლი შეაშრება...