სამშობლოს გზები
-------
ჩემი ცა - უფლის
მოქსოვილი
წმინდა ბადეა,
ჩვენ კი ბებერი
ხარებივით
გუთნებს შევებით,
მზეწაკიდებულ
ბუჩქებს შორის
მიდი - მოდიან
სამშობლოს გზები
- მოსესავით
ფეხშიშველები...


პოეტმა ოთხი წიგნი მაჩუქა
----------------------
                          ირმა ბეგლარშვილს

ნაღდი სტრიქონი ისევ მიტაცებს,
ალბათ ამ დილის მადლია ესეც,
დევს ოთხი წიგნი ჩემს მაგიდაზე
და ოთხი ირმა მიკითხავს ლექსებს,

როგორ არ მინდა შევრცხვე სტუმართან,
სულ სხვანაირად ვღელავ დილიდან,
დევს ოთხი წიგნი ჩემს სასთუმალთან
და ჩემი სახლი ოთხჯერ თბილია...

დღეს სტუმრები მყავს, არ ვიტყობ დაღლას,
ეს დღე მასპინძელს რას არ მავალებს,
ოთხი წიგნიდან დამყურებს ახლა,
ჩემი ოთახი ოთხჯერ მაღალი...

ნაღდი სტრიქონი ისევ მიტაცებს,
ალბათ ამ დილის მადლია ესეც,
დევს ოთხი წიგნი ჩემს მაგიდაზე
და ოთხი ირმა მიკითხავს ლექსებს,



ჯუმბერ ჯიშკარიანს
--------
საწუთრო პურის
თავთავის ძნაა,
მწყერის ქვით - კირი
არის ნიშანი,
წინ დამიჯექი
უფროსო ძმაო,
გული წიგნივით
გადამიშალე...

უკვე მამალი
პეტრეს იძახის,
ჯვარზე გააკრეს
უკვე მესამე,
უფროსო ძმაო
წინ გამიძეხი
სიტყვა ამინთე
გზებზე მზესავით...




გულიდან

გულიდან მწყდება და მეცლება.
მკერდიდან ვწყდები და ვეცლები,
ლექსები - მდუმარე ხეები,
ხეები - შრიალა ლექსები...

ბაგუნობს სხეულში ბაგუნობს,
ძაგძაგებს ძარღვებში ძაგძაგებს,
ყოველი ჩავლილი ვაგონი,
ყოველი გავლილი ბაქანი...

ვშორდები, რაც უფრო ვშორდები,
ამაგზნებს, მით უფრო ამაგზნებს,
რელსები - შარაგზის ნოტები
გუგუნი - სიმღერა შარაგზის...

გულიდან მწყდება და მეცლება.
მკერდიდან ვწყდები და ვეცლები,
ლექსები - მდუმარე ხეები,
ხეები - შრიალა ლექსები...