ვიცი ძმაო

ვიცი ძმაო, ყველა ლექსი დამიბერდა,
გამიხუნდა ის, რაც დღემდე ხელით ვძერწე,
ძველი ტიკი ახალ ღვინოს ვერ იტევს და
მე გავუძლებ დამაჭრებულ ამდენ ლექსებს?!

ჩემი ნაძვიც დაბერდა და ცისკენ იწევს,
ჩავლილ დღეებს ხმიადივით ქარში ვიყოფთ,
დღეს ვდგავარ და კალმის წვერით ვაძრობ ხიწვებს,
ამოჩორკნილ და კორძიან ბებერ სტრიქონს...

არ გეგონოთ პოეტობის მსურს ალიბი,
ან ზეცისკენ გამახედოს ყველა კიბემ,
ვაკაკუნებ და ბებერი დურგალივით
ფანჯრის ნაცვლად აივნებზე ლექსებს ვკიდებ...

ვიცი ძმაო, ყველა ლექსი დამიბერდა,
გამიხუნდა ის, რაც დღემდე ხელით ვძერწე,
ძველი ტიკი ახალ ღვინოს ვერ იტევს და
მე გავუძლებ დამაჭრებულ ამდენ ლექსებს?!