როდესაც გინდა, რამის გამხელა,
ბოქლომი მოხსნა გრძნობის სილუეტს,
გულის ფიქრებს ნუ დაატუსაღებ,
და ნურც მოუსმენ ავ ხმების დუეტს,

რომელიც შიშის შიშს ჩაგჩიჩინებს
და გებრკოლება სულის შვებაში,
თან გიწიოკებს ნატვრებს, იმედებს,
გბოჭავს გრძნობების გაშიშვლებაში..

ამ დროს არ აჰყვე შიშნარევ პათოსს,
მიუყურადე გულის ძახილებს,
თქვი ის, რაც გრძნობად, ფიქრად გიფეთქავს,
ენდე თვითრწმენის გამოძახილებს.

და ამოღერღე, ოღონდ თამამად,
გულის ძარღვებში რაც გილივლივებს,
ზუსტად ის აღარ განმეორდება,
ჰოდა თქვი, სანამ გადაგივლიდეს!..