ათასი დათესე, ერთიც რომ მოიმკას,
გახსოვდეს ათასი,
ნუ შეურიგდები იოლად ანანკეს,
დათესე, დათესე,
ნუ შეურიგდები ფრთაძლიერ გრიგალებს,
დაძლიე, დაძლიე,
ფრთაძლიერ გრიგალებს ნუ შეურიგდები,
გრიგალებს-ფრთაძლიერს,
ნუ დაგეზარება კავი და ერქვანი,
წერაქვი, ურიკა...
გაკვეთე ხრიოკი ზეგანი, კირ-ქვანი,
მალაყით, ურიგოდ.
ათასი დათესე, ერთიც რომ მოიმკას,
ვაზიდან ნაყოფი,
დაათვრე ბახუსი, აცეკვე ანანკე
ან დინჯად ამყოფე,
ნუ შეურიგდები! ნუ შეურიგდები!
დაძლიე! დაძლიე!