იცი თურმე ხანდახან მკვლელსაც შეუყვარდება
თურმე ზოგჯერ მეძავიც სირცხვილსაც კი დაიმჩნევს
ყოველ საუკუნეში ერთი დაიბადება
ის ვინც ერისკაცობას უყოყმანოდ აირჩევს

იცი თურმე მგოსნებსაც გაურბიან მუზები
იცი მაშინ სხეული როგორ აკანკალდება
იცი ზოგჯერ ცოცხალსაც დაესევა ბუზები
იცი ზოგჯერ არწივიც როგორ აკაკანდება

იცი ზოგჯერ იუდაც ერთგულებას ეჩვევა
ზოგიც ალბათ იესოს ყველა სამსჭუალს დააძრობს
მჯერა სისხლის მაგივრად ხმალს ცრემლი დაემჩნევა
ისე ადუღებული რკინასაც რომ დაადნობს

მჯერა ყოფა ასეთი მჯერა ცვალებადია
მჯერა ბოროტს ოდესმე მაინც შეცვლის კეთილი
მჯერა კარგი საქმენი რაც ყველას აბადია
საუკუნედ იქნება ცაზე ამოკვეთილი

მჯერა ცასაც ოდესმე თავის კიბე ექნება
მჯერა ზღვაზეც იქნება ხიდი გადაჭიმული
მჯერა ადამიანი დემონს ეპაექრება
ეს ხომ არჩევანია გადარჩენის გმირული

იცი ერთხელ ომისგან ფარიც დაიჟანგება
კაციც დაღლილობისგან თოფს და ხანჯალს დააგდებს
არვის გაეფიქრება ბაბილონის აგება
ევაც ეშმაკს ლოცვებით ჯოჯოხეთში გააგდებს

იცი ერთ დღეს უეცრად ყვავილები დაჭკნება
უხილავი იქნება სუყველასთვის ხილული
და ერთადერთ საჩუქრად სიყვარული დარჩება
ის კი ჩვენი ღმერთივით არის მარადიული