ვინ ამაგრებს ცაზე, ნეტავ,
ღამით მბრწყინავ ვარსკვლავებს?
ანდა, სავსე მთვარეს მაღლა
ვისი ხელი აკავებს?

ცისარტყელას დასახატად
რას ხმარობენ – აკვარელს?
მზე რომ ჩადის და ამოდის,
ცაზე ფეხს არ აკარებს?

ვისაც ვკითხე, არ მპასუხობს,
მხოლოდ ჭკუას მარიგებს:
– ჯერ პატარა ბიჭი ხარ და
გაიზრდები, გაიგებ!

ახლა უკვე სხვაზე მეტად
ეს კითხვა არ მასვენებს –
ნეტავ, მალე გავიზრდები,
წვიმა თუ დამასველებს?