აიხსნა კარავი. ადრიანი დილაა.
  ქალები: თვალები ყურყუმი, თმაზე მეტად შავი. ტანზე ხაბარდა ოთხკეცი, წითელი და  მწვანე.
  სუნი,სუნამო,  ოფლში არეული .
  ხელში სიგარეტი.წელზე ფართე ქამარი.დიდი ჯიბეები,თვალის  ქვები.
  ყურებზე კონწიალა საყურე,  წითელი პომადა, თითებზე  ვერცხლი და ფერადი "ჯართი".

  ცაზე ცისარტყელა.

  კარავზე ფარდები, წითელი და მწვანე, როგორც  ის ხაბარდა, თეძოს რომ უფარავს და ლამაზად  არხევს.
  მკერდი  დამალული,  მაგრამ ათქვირებული.
  ხელში ატეხილი კარტი , ზღვისფერი  ქვები და  ბანქო .ზურგზე აკრული მეძუძური ბავშვი.
  მთელი დღე ერთი და იგივე.ყვირილი, ყაყანი, ტრიალი, ბზრიალი.
---შენს ქმარს სხვა ქალი არი!
---ბედი გაგეხსნას, მოდი, გითხრა!
---შენ ბევრი ფული იყოს, მომე ლარი, გიმკითხავო!
---მოდი , ჯადო არის ქალო!
  დაჭმუჭნული და ხელში გაოფლიანებული ბინძური ფული.
   
  შუადღე, სიცხე.  ბაღის აუზი. ტანსაცმლით წუწაობა.სველი  ტანისამოსი, მხრებზე და თეძო-მკერდზე ატმასნილი.

    ცაზე ისევ ცისარტყელა.

  სამჯერ გადახსნილი მკერდი , ოდნავ მიფარებული, შავი კერტებიდან  ჩვილის დანაყრება.

  საღამო, ბზრიალი, ტრიალი,ყაყანი, ხელში  ატეხილი კარტი, ფერადი ქვები და ბანქო,სიგარეტი და ფერადი "ჯართი"
  ისევ კარავი. დახურული და უჰაერო, სიცოცხლესავით ყველასაგან მიტოვებული და უჩინარი.