შენ ალბათ გინდა მიაშურო რომს ან ვატიკანს,
გქონდეს მცირედი ფლირტის დოზა მეგონდოლესთან-
ვენეციაში.
გადადე გვერდზე ყველა სახის ნუმიზმატიკა,
არ გამიცივდე, თავს მიხედე, მანდ ხომ ნესტია,
ნესტოს წინაშე.
შენ ალბათ გინდა გადაუღო ფოტო რიკულებს,
ფრთათეთრ თოლიებს, მეთევზეებს, ძვირფას სასტუმროს,
თან გაქვს Зенит-ი.
მუნჯი ხიდები შენთვის სხვა წყლის რიტორიკაა
ან უწყლოობა. მე ყელში მაქვს ალადასტური,
შენ კი-აბზინდა.
შენ ალბათ გინდა შეეკედლო ვინმე კონსიერჟს-
გადაღლილს ზეპირ მისალმებით თითო ტურისტის
ან სულაც გიდის.
თან, საკუთარი პასპორტი გაქვს, მე კი-დოსიე,
რომელიც მოწმობს, რომ პოეტი ფუტურისტია
და ლექსებს ჰყიდის.
შენ ალბათ გინდა მიაშურო რომს ან ვატიკანს...