ჩაშავებული ანწლიანები
/თვალმა ფერები მოისაკლისა/
ჟამი სხვაგვარი აწრიალების
ჟამი სხვაგვარი ფორიაქისა.

ტკივილი ძველი და დღე ახალი
/სუსხი სასახლის ლიბოწყეულის/
ფიქრი მზისა და ნავენახარის
გულის სევდიან სითბოდ ქცეული.

დახავსებული კიბეები და
შორს დარჩენილი გზა და ხიდები
აუმღვრეველი სიღრმეებიდან
ამონათება მარგალიტების.

ღრუბლები-ბრძენი ამბოკარები
მწვანე ფურცელზე თოვლის ნოტები
მელოდიები გამოდარების
ნელი ბიბინი ჰორიზონტების.