სიცოცხლე_შენთვის ლოცვაა,
შორიდან შუბლში კოცნაა,
უფალმა ასე ინება...
სიცოცხლე შენთვის სევდაა,
სიხარული და ელდაა,
ბნელში ხმის შემობრწყინება.

სიცოცხლე შენთვის ტანჯვაა,
გულის მთლიანად ხარჯვაა
და უძილობა ფიქრისა.
სიცოცხლე_შენთვის კვდომაა,
თოვლსა და ცეცხლში დგომაა
და მოლოდინი ცისკრისა...

საწუთროს დავემდურები?
ღმერთო,რატომ და რისთვისა?! 

***
შენი წასვლა და სამყაროს
გაფერმკრთალება ერთია,
მზე ჩადის სიხარულისა,
სევდა ათასჯერ მეტია,
ცას ყვავილები შორდება,
ზამთარი მიახლოვდება,
ღიღინში ცრემლის წვეთია.
ფიქრი ლოცვა და ნატვრაა,
სიტყვა ხატი და ღმერთია.

შენი წასვლა და სამყაროს
გაფერმკრთალება ერთია!

***
ნეტავ სულ ერთად გვამყოფა,
ვით მინდვრის ყვავილებიო,
სულ ერთ სივრცეში გვაფრინა,
სანამ დაგვცვივა ფრთებიო,
ან ერთი ნავით გვაცურა,
შემოგვატარა ზღვებიო,
ან სადღაც,მზისფერ კუნძულზე,
შემოგვეხარჯოს წლებიო...

და ბოლოს ერთ სამარეში
დაადნო ჩვენი ძვლებიო.